9 مامىر - جەڭىس كۇنى! بۇل جەڭىس وڭايلىقپەن كەلگەن جوق. مايدانگەرلەردىڭ يىعىنا اسا اۋىر جۇك ءتۇسىپ, وتانى, ەلى ءۇشىن وت بولىپ جاندى, وق بولىپ اتىلدى. قانشاما بوزداقتار ۇرىس دالاسىنان قايتپاي قالدى. ارىن-بايراق, نامىسىن نايزا ەتكەن ەرلەردىڭ قاھارماندىعى اڭىزعا اينالدى.
وسىناۋ مەرەيلى كۇنگە وراي 3 مامىر كۇنى اباي كىتاپحاناسى ۇلى جەڭىستىڭ 73 جىلدىعىنا ارنالعان «سوعىس وتى شارپىعان اندەر» اتتى ادەبي-مۋزىكالىق كەش وتكىزدى. كەش بارىسىنا ارنايى پەتر كولومين, گريگوري مالوروۆ سىندى سوعىس ارداگەرلەرى شاقىرىلدى. كەش قوناقتارى بۇل جيىندا قىسقاشا ومىرباياندارىمەن تانىستىرىپ, سونىمەن قوسا قان مايدان كەزىندەگى ازات ەتكەن جەرلەردى دە تىلگە تيەك ەتتى.
ءىس-شارا بارىسىندا سوعىس جىلدارىنداعى جاۋىنگەرلەرگە رۋح بەرگەن, ءۇمىت سىيلاعان «داريعا سول قىز», «كەستەلى ورامال», «كاتيۋشا», «كەزدەيسوق ۆالس» سىندى ءان شاشۋلار ايتىلدى. كەشكە سالتانات سىبانباەۆا, دانيار احماديەۆ سىندى قالامىزدىڭ بەدەلدى انشىلەرىن ارنايى شاقىرىپ وتىرمىز. سونىمەن قاتار قازاق يننوۆاتسيالىق گۋمانيتارلىق-زاڭ ۋنيۆەرسيتەتىنىڭ اسكەري كافەدراسىنىڭ وقىتۋشىسى, زاپاستاعى پولكوۆنيك قايرات تۇرلىبەكوۆ جانە زاپاستاعى مايور تالعات جارىقباسوۆتىڭ باسشىلىعىمەن ستۋدەنتتەردەن قۇرالعان حور مەن اسكەري دەفيلە كورسەتىپ وزدەرىنىڭ ۇلەستەرىن قوستى.
بۇدان بولەك اتالمىش ءىس-شارانى « ۇلى جەڭىس - بولاشاق ۇرپاققا مۇرا» اتتى سوعىس جىلدارىنداعى شەجىرەلى كىتاپ كورمەسى تولىقتىردى.
راۋشان نۇعمانبەكوۆا